Örfá orð frá okkur til allra
Kæru vinir,
Árið 2025 tók samfélagið sameiginlega ákvörðun um að breyta sárri sorg í afl til góðs. Einstaklingar, skólar, íþróttafélög, fyrirtæki og góðgerðarfélög hafa sýnt okkur að samkennd og kærleikur eru ekki bara hugtök heldur athafnir sem sýnd eru í verki. Á einu ári bárust sjóðnum 324 styrktargreiðslur frá 261 einstaklingi, 15 fyrirtækjum og 48 verkefnum og félagasamtökum, samtals 83,1 millj. kr.
Stærsta verkefni ársins er fjármögnun og undirbúningur Bryndísarhlíðar - sérhæfðrar ofbeldis- og áfallamóttöku fyrir börn og ungmenni, í samstarfi við Landspítala og stjórnvöld. Sjóðurinn er fjárhagslegur bakhjarl verkefnisins og með Kærleiksherferðinni hefur okkur tekist að færast verulega nær markmiðinu um að opna fyrsta úrræði sinnar tegundar á Íslandi.
Samhliða þessu fór fram fyrsta almenna úthlutun sjóðsins þann 2. febrúar 2025, þar sem fimm verkefni hlutu styrki að fjárhæð 4,3 millj. kr. - hvert þeirra valið vegna skýrrar tengingar við tilgang sjóðsins: forvarnir gegn ofbeldi, stuðning við börn og ungmenni og eflingu samkenndar í samfélaginu.
Stjórnin hefur á árinu lagt áherslu á að tryggja faglega stjórnarhætti, gagnsæi í fjárreiðum og ábyrga ráðstöfun fjármuna. Á árinu 2026 munu starfsreglur stjórnar, úthlutunarreglur og siðareglur sjóðsins verða birtar opinberlega samhliða áframhaldandi uppbyggingu Bryndísarhlíðar.
Fyrir hönd stjórnar Minningarsjóðs Bryndísar Klöru þakka ég ykkur hjartanlega fyrir ómetanlegt framlag og stuðning við starf sjóðsins. Hvert skref sem við tökum saman er skref í átt að betra samfélagi fyrir börnin okkar.
Fyrir hönd stjórnar,
Guðrún Inga Sívertsen
formaður stjórnar
Elsku samfélag,
Í sorginni er myrkrið oft yfirþyrmandi, en á þessu ári hafið þið verið ljósið sem vísar okkur veginn. Viðtökurnar sem minningarsjóður elsku Bryndísar Klöru hefur fengið eru okkur dýrmætari en orð fá lýst. Hvert faðmlag, hver kveðja og hvert framlag í sjóðinn hefur sýnt okkur að hjarta Bryndísar Klöru slær enn í gegnum ykkur.
Takk fyrir að hjálpa okkur að breyta sársaukanum í tilgang. Takk fyrir að standa með okkur, ekki bara í sorginni, heldur í voninni um betri og öruggari heim fyrir börnin okkar allra. Við göngum inn í framtíðina með ykkur, staðföst í þeirri trú að kærleikurinn sigri að lokum.
Með kærleik og þakklæti,
Birgir & Iðunn
